GRENADELLA-KAASKOEK met ’n verskil

Kaaskoek is vir baie mense ’n groot gunsteling, maar hulle sien amper nie kans om dit self te bak nie. Daar is baie verskillende kaaskoekresepte en die geure wat in ’n kaaskoek gebruik kan word, is eindeloos. Heleen Meyer het jare gelede dié weergawe met grenadella iewers geproe en vir die resep gevra. Nou vra mense haar weer gereeld vir die resep, as hulle hierdie lekker somernagereg geëet het.

Dis ’n maklike alternatief vir ’n gebakte kaaskoek en het steeds ’n lekker romerige tekstuur, maar dit word inderdaad gevries en nie gebak nie – sommer ekstra lekker vir ’n warm somersdag. Dit kan ook lank voor die tyd gemaak word wat dit ideaal maak vir die besige feestyd. Die basis is hoofsaaklik suiwelprodukte, soos met baie ander kaaskoekresepte en dan kondensmelk om die gevriesde weergawe steeds romerig te hou. Die grenadella is so lekker saam met die maaskaas en room, maar loer gerus na die wenk om ’n bessieweergawe ook te kan maak.

Die kors van die kaaskoek word met suurlemoenroomkoekies (Lemon creams) gemaak, maar as jy avontuurlustig voel, kan jy sjokoladekoekies ook gebruik (soos Romany creams), want grenadella en sjokolade is ’n baie lekker kombinasie. Let ook mooi op na die metode, dis baie eenvoudig, maar kan verwarrend of verkeerd voel. Die loperige vulsel word in ’n uitgevoerde koekpan of ander vorm geskink en dan word die koekiekrummel bo-op gepak. Dit word dan só gevries, want wanneer die koek op ’n bord uitgekeer word, is die koekielaag aan die onderkant. Die metode verduidelik baie mooi wat om te doen, so volg dit net stapsgewys.

Bevrore grenadella-kaaskoek

Resep deur Heleen Meyer uit Kos is op die tafel!

Lewer 10 – 12 porsies

Kors

1 x 200 g-pakkie suurlemoenroomkoekies (Lemon creams)

100-125 g (100-125 ml) botter, gesmelt

Vulsel

2 x 397 g-blikke kondensmelk

250 ml (1 k) suurlemoensap

200-250 g geroomde of gladde maaskaas

250 ml (1 k) vars room

2 x 115 g-blikke grenadellapulp

1. Voer die bodem en kante van ’n 24 cm-koekpan of 10-12 individuele koppies of klein bakkies (wat gevries kan word) met kleefplastiek uit, sodat daar genoeg oor die rand bly hang om die kaaskoekmengsel mee te kan bedek.
2. Kors: Breek die koekies in kleiner stukke en meng in ’n voedselverwerker tot fyn krummels. As jy nie ’n voedselverwerker het nie, sit die koekies in ’n stewige vriessakkie en rol met ’n rolstok of leë bottel fyn. Meng die botter deeglik deur en hou eenkant.
3. Vulsel: Plaas die kondensmelk en suurlemoensap in ’n groot mengbak en klits tot dit verdik. Klits die maaskaas en room deeglik by en roer die grenadella deur.
4. Skink die mengsel in die koekpan of bakkies. Skep die beskuitjiekrummels bo-op, versprei eweredig en druk liggies teen die mengsel vas.
5. Bedek kaaskoekmengsel met die kleefplastiek wat oor die rand hang en plaas nog ’n laag bo-oor. Vries oornag of tot benodig.
6. Verwyder die boonste laag kleefplastiek. Keer die kaaskoek op ’n verkoelde bord uit (sit dit vooraf in die vrieskas). Trek die orige kleefplastiek af en sit dadelik voor. Sny met ’n groot skerp mes in skywe.

Wenke:

1. Voer ’n’n 1,5-2 liter broodpan met kleefplastiek, soos hier bo beskryf en vul met die mengsel en krummels. Die brood-vorm is baie maklik om in skywe te sny.
2. As die kaaskoek baie hard gevries is, kan dit vir ’n minuut of twee staan voor dit gesny word. Doop die mes in ’n beker met kookwater om die snywerk makliker te maak.
3. Die kaaskoek kan tot 1 maand gevries word. Enige oorskiet kan ook net weer gevries word.
4. Vervang die grenadella met 125 g bevrore aarbeie, frambose of gemengde bessies. Verpulp die vrugte en roer soos die grenadella by die maaskaasmengsel in.

Vir nog resepte soos hierdie KLIK hier om na Heleen se webwerf te besoek.

Foto deur Adriaan Vorster